Mark 9

1 ^aMuri i taki ria i ta maea, “A taki muholi mua, i ranga ne mua mu pesi koea ngane, i uka ma mu gu mate ma, bara mu masia a harikianga na Vure ge valai turana nitora.”

A Kakaine Isu i Mareli

(Mateo 17:1-13; Lukas 9:28-36)

2 ^bMuri na parava i polotara e Isu i tuli kunana e Petrus, e Iakop, e Ioanes, to sike na lolo dagi. Na tahuna to made vonga, e Isu i mareli na matane tou. 3A varakia vona i para hateka, i kea hateka. I uka tara viri na malala ge ratea tara varakia ge kea maea. 4Muri e Elaisa e Moses ru bele vakaturutu, ru ta turane Isu. 5Lakea e Petrus i takia e Isu, “Mari ni tovo, i kamumu hateka te valai koea. Mete ge hae a kape ge tolu, ne vomu tara, ne Moses tara, ne Elaisa tara.” 6E Petrus i ta tavulavula, a vuhuna to mangenge hateka. 7Muri a bubu i valai i kavitagu tou. To longoa a ngava i pagitala na bubu i ta maea, “Ra bakovi iea e tugu, a hategu. Moto longo maia a nitana.”

8Na tahuna to mata viliha lae, to turutu, i uka ma to matai ranga a viri. E Isu kunana i pepesi vonga.

9Na tahuna to laho puru, e Isu i taki tora tou nahea to go vakalongoa tara viri, to go mangulu mavonga ge harena na tahuna a Tuna Bakovi ge pesi rike mule na matenga. 10To ruhuloloa ne tou a ngava, lakea to vanana vona ra ngava ge “pesi rike mule na matenga,” i navai tavulai.

11 ^cMuri to nanea, “I navai e huriki a mari na vinara ri takia e Elaisa ta ge valai muga?”

12 ^dE Isu i koli i ta maea, “I muholi, i takia e Elaisa ge valai muga, ge rata karaba a maki lobo. Pali ge navai ra nita ni here puru muga i taki a Tuna Bakovi bara i bole a nimadihi hateka, e huriki lobo ri gi marikoi vona? 13 ^eA taki mua, e Elaisa i valai pali. Ri rata virihia vona a maki lobo ri ngaru ri gi rata virihia vona, i muri mai a ngava ni here puru hosi.”

A Riau i Dili Vona a Hanitu

(Mateo 17:14-21; Lukas 9:37-43)

14Na tahuna e Isu, e Petrus, e Iakop, e Ioanes to bele taho e huriki a murimuri ranga, to matai e huriki ala kupo ri vapopo halui ria. E huriki a mari na vinara ri vahehe turana e huriki a murimuri. 15Na tahuna e huriki ri vapesihi ri masia e Isu i bele, ri vivi vona, lakea ri nunu lokovonga, ri gi taguia. 16Lakea e Isu i nana ria, “A ra mu vahehe vona?”

17A bakovi tara i koli i ta maea, “Mari ni tovo, a tuli vilia vomu e tugu a bakovi. I dili vona a hanitu i ratea i ngavarubu. 18Na parava ranga a hanitu i ratea i boru puru na malala. I bubu vona a vere a ngavana, i vaheri a ngina, i katoro ia. Iau a taki e huriki a murimuri vomu ta ri gi lili talea a hanitu, pali ri keri.”

19Lakea e Isu i koli, i ta maea, “Mua e huriki na tahuna mona, i uka ma mu luhoi torea a Vure. Ge navai? Ga hatenono mavonga ni dava mua, mu gu luhoi tora iau?” Muri i takia a bakovi iea, i ta maea, “O tuli vilia e tumu.”

20Lakea ri tuli vilia vona. Na tahuna a hanitu i masia e Isu, i malaviriri kunana i ratea a riau i tangitoru. I boru puru na malala, i tohi lae, i bubu vona a vere a ngavana. 21Lakea e Isu i nanea e tamana koma, “Garika i tubu vona a gilanga iea?”

E tamana i koli i ta maea, “I tubu na tahuna i kiroko vona. 22I balaka kupo a hanitu i voro rikea na kanono, i voro purua na naru ta ge rabalakia. Pali ioe bara o kara ni ratea tara maki, o dodo maria o kori maria.”

23 ^fLakea e Isu i ta maea, “I navai o ta maea, ‘Pali ioe bara o kara?’ A maki lobo a maki tavula na viri i luhoi tora iau.”

24E tamana i malaviriri kunana i koli, i ta maea, “A luhoi tora ioe, pali o tuhori iau na tahuna i uka ma a luhoi tora ioe!”

25Na tahuna e Isu i matai e huriki ri nunu valai tabukoi ne ria, i tahatea a hanitu i ta maea, “Ioe a hanitu voupatuli, a ngavarubu, a taki tora ioe, o pagitala vona, naha ni dili tabu vona.”

26 ^gLakea a hanitu i haloho, i ratea a koma i tangi torutoru, muri i pagitala vona. A koma ngane i mata manga i mate, lakea e huriki ri ta maea, “I mate pali.” 27Pali e Isu i lokovonga, i nugua a limana i tuli pesia. 28Na tahuna e Isu i dili na ruma, e huriki a murimuri vona ri nana kapiloho ia, “I navai mi keri ni lili talea a hanitu iea?”

29E Isu i koli, “A hanitu maea, i uka ma ge pagitala tavula. Mu vasileki, mu peremu taro, muri bara i pagitala.”

E Isu i Vakalongo Muga a Nimatena

(Mateo 17:22-23; Lukas 9:43)

30 ^hMuri ri pe a hini ngi, ri laho polo vona e Galili. E Isu i uka ma i ngaru e huriki ri gi lohoka vona a hini ri made vona, 31 ⁱa vuhuna i tovo e huriki a murimuri vona. I taki ria, i ta maea, “A Tuna Bakovi bara ni habi na limane huriki a bakovi, ri gi rabalakia. Muri na parava i tolu bara i pesi rike mule na nimate.” 32 ^jI uka ma ri longokilalea a pelegona ngava, pali ri mangenge ni nanea e Isu.

E Rei Ge Muga

(Mateo 18:1-5; Lukas 9:46-48)

33Ri lakea na tanga e Kapernaum. Na tahuna ri made na ruma tara, lakea e Isu i nana e huriki a murimuri vona, “A ra maki mu vata vona na dala?”

34Pali ri mangaulu kunana, a vuhuna ri vanana vona na dala, ne rei ne ria i dagi hateka. 35 ^kLakea e Isu i made puru i gale lokovonga vona e huriki a murimuri ala ravulu a polona i rua, i taki ria, “E rei i ngaru ni muga, ge ia a iku, a vora ne huriki lobo.” 36Muri i vakapesia na kurukurune ria a koma kiroko. I boko rikea, i taki ria, 37 ^l“E rei a viri i tagui a koma kiroko maea na ragu, i tagui iau. E rei a viri i tagui iau, i taguia ra viri i rudu iau a valai.”

38Muri e Ioanes i ta maea, “Mari ni tovo, mi masia tara bakovi i lili tala a hanitu na ramu, lakea mi takia nahea ge rata tabua a naro iea, a vuhuna i uka ma ia e turane hita.”

39Pali e Isu i taki ria i ta maea, “Naha ni hatekakaria. I uka tara viri i rata a nivakasiri na ragu muri ge pagepolo ge ta hale nau. 40 ^mA viri i uka ma i rata hale hita, ia e turane hita. 41 ⁿA taki muholi mua, e rei a viri i habi a naru ne mua na ragu a vuhuna mua a tara ne Kristo, muholi hateka bara i bole a mapana.

A Naro Hale i Vakahale a Niluhoi

(Mateo 18:6-9; Lukas 17:1-2)

42“Pali e rei a viri ge ratea a koma kiroko maea, ra i luhoi tora iau, ge dili na naro hale, bara i kamumu hateka ni gi topi na lohona a kedo dagi, ni gi voro puru na utu, ge pasiri. 43 ^oA limamu tara ge rata ioe go rata a rabu hale, o palakudua o vurokia, ma go puru na kanono i uka ma i mate kilala turana limamu i rua. I kamumu bara o tahoka a limamu i taku kunana, o bole a nimahuri vakaroro. 45A vahamu ge rata ioe go rata a rabu hale, o palakudua, o vurokia, ma ni gi voro puru ioe na kanono turana vahamu i rua. I kamumu bara o tahoka a vahamu i taku kunana, o bole a nimahuri vakaroro. 47 ^pPali a matamu tara ge rata ioe go rata a rabu hale, o sigi talea, ma ni gi voro puru ioe na kanono turana matamu i rua. I kamumu bara o tahoka a matamu i taku kunana, o dili na harikianga na Vure. 48 ^qRa tanga na kanono iea,

‘a maka mata kiroko ri pidi lae na kakaine huriki, i uka ma ri mate kilala.
Pali a kanono tara i uka ma ge mate.’
49“E huriki a prister ri ru a sol na maka nihabi, ne vona ni rata a nihabi ge malamala na matana Vure. I mavonga kunana, a kanono ge bele ne huriki lobo.

50 ^r“A sol a maki kamumu. Pali ge lobo a namina, mu gu rata navia ge tahoka a namina tabu? Mu nami manga a sol, mu vakabele a nivalemu ne huriki ri luhoi tora iau.”